ఇప్పుడు అంతా రీ రిలీజ్ ట్రెండ్ నడుస్తుంది. సూపర్ స్టార్ మహేష్‌ బాబు పుట్టినరోజు సందర్భంగా ఇటీవల బిజినెస్ మేన్ సినిమాను రీ రిలీజ్ చేశారు. మహేష్‌, పూరి కాంబోలో తెరకెక్కిన బిజినెస్ మేన్ అప్పట్లో ఓ సంచలనం. ఈ సినిమాకి రీ రిలీజ్ కి అడ్వాన్స్ బుకింగ్స్ ఓపెన్ చేసిన గంటలోనే టిక్కెట్లు అయిపోవడం విశేషం. ఇది కామన్ ఆడియన్స్ కి మాత్రమే కాదు.. డిస్ట్రిబ్యూటర్స్ కు సైతం షాకింగ్ గా మారింది. ఈ మూవీ ఇప్పటి వరకు ఉన్న రీ రిలీజ్ ల రికార్డులను క్రాస్ చేసి సరికొత్త రికార్డ్ క్రియేట్ చేసింది. దీంతో బిజినెస్ మేన్ రీ రిలీజ్ ఇండస్ట్రీలో హాట్ టాపిక్ అయ్యింది.
అయితే.. ఇప్పుడు పాన్ ఇండియా స్టార్ ప్రభాస్ నటించిన యోగి సినిమాను రీ రిలీజ్ చేస్తున్నారు. ఈ చిత్రానికి డైనమిక్ డైరెక్టర్ వి.వి.వినాయక్ డైరెక్టర్. ప్రభాస్ నటించిన వర్షం, బిల్లా చిత్రాలు 4కె వెర్షన్‌లో రీ రిలీజ్ అయ్యాయి. తాజాగా యోగి చిత్రం ఈ నెల 18న 4కె వెర్షన్‌లో రీ రిలీజ్ అవుతోంది. అప్పట్లో మిక్స్డ్ టాక్ తెచ్చుకున్నప్పటికీ ప్రభాస్ యాక్టింగ్‌కు మంచి మార్కులు పడ్డాయి. ఈ సినిమాలో ప్రభాస్‌కి జంటగా అందాల తార నయనతార నటించింది. ఇప్పుడు యోగి రీ రిలీజ్ అవుతుండడంతో బిజినెస్ మేన్ సెట్ చేసిన రికార్డ్ ను క్రాస్ చేస్తుందా..? లేదా..? అనేది ఆసక్తిగా మారింది.
