రెబెల్ స్టార్ ప్రభాస్ దిగ్విజయంగా తన 22 ఏళ్ల నట ప్రస్థానానికి చేరుకున్నారు. 2002లో ఈశ్వర్ సినిమాతో మొదలైన ప్రభాస్ టాలీవుడ్ జర్నీ నేటితో 22వ యానివర్సరీ జరుపుకుంటోంది. జయంత్ దర్శకత్వంలో వచ్చిన ఈశ్వర్ సినిమా సరిగ్గా ఈరోజు నవంబర్ 11న 22 ఏళ్ల కిందట ప్రేక్షకుల ముందుకొచ్చింది. ధూల్ పేట యువకుడిగా ఈ సినిమాలో ప్రభాస్ చూపించిన నట ప్రతిభ తెలుగు ప్రేక్షకులను ఆకట్టుకుంది. తొలి చిత్రంతోనే ప్రభాస్ అందరివాడుగా మారిపోయాడు.
తన ఒక్కో సినిమాతో ఒక్కో మెట్టు అధిరోహిస్తూ రెబెల్ స్టార్ గా ప్రపంచఖ్యాతిని సొంతం చేసుకున్నాడు ప్రభాస్. ఈ రోజు ప్రభాస్ సినిమా వస్తుందంటే సినీ ప్రియులంతా ఎదురుచూసేంత క్రేజ్ ఏర్పడింది. వందల కోట్ల రూపాయల బడ్జెట్ తో ఆయనతో సినిమా చేసేందుకు నిర్మాతలు పోటీ పడుతున్నారు. వెయ్యి కోట్ల రూపాయల వసూళ్లు మిగతా హీరోలకు గగనం అయితే ప్రభాస్ కు అలవాటుగా మారాయి. ఇప్పుడున్న లైనప్ చూస్తుంటే ప్రభాస్ కు సమీపంలోకి కూడా మరో స్టార్ రాలేరేమో అనిపిస్తోంది. ది రాజా సాబ్, సలార్ 2, కల్కి 2, స్పిరిట్ తో పాటు హను రాఘవపూడి, మైత్రీ మూవీ మేకర్స్ సినిమా, హోంబలే ఫిలింస్ లో మరో రెండు చిత్రాలు చేస్తున్నారు ప్రభాస్.
