ఇప్పుడున్న పరిస్థితుల్లో రిలీజ్ డేట్ ముందే లాక్ చేసుకున్నప్పటికీ.. అనౌన్స్ చేసిన డేట్ కి మూవీని రిలీజ్ చేయడం కుదరడం లేదు. మెగాస్టార్ చిరంజీవి నటిస్తోన్న విశ్వంభర సంక్రాంతికి రావాలి అనుకుంది. జనవరి 10న రిలీజ్ అని ఎప్పుడో ప్రకటించారు కానీ.. రావడం లేదు. ఆతర్వాత మరో డేట్ కు వచ్చేందుకు ప్లాన్ చేస్తున్నారని ప్రచారం జరిగింది. ఇప్పుడు విశ్వంభర అనుకున్న డేట్ కు మాస్ మహారాజా రవితేజ సినిమాను రిలీజ్ చేస్తున్నారు. మరి.. విశ్వంభర వచ్చేది ఎప్పుడు..?
విశ్వంభర మూవీని జనవరి 10న రిలీజ్ చేయాలి అనుకున్నారు కానీ.. ఓ వైపు గేమ్ ఛేంజర్ వస్తుండడం.. మరో వైపు విశ్వంభర ఓటీటీ డీల్ క్లోజ్ కాకపోవడంతో వాయిదాపడింది. విశ్వంభర కొత్త రిలీజ్ డేట్ ప్రకటించలేదు కానీ.. మే 9న రిలీజ్ చేయాలి అనుకున్నారని ప్రచారం జరిగింది. జగదేకవీరుడు అతిలోకసుందరి 1990లో మే 9న రిలీజ్ అయ్యింది. సంచలన విజయం సాధించింది. అందుచేత సెంటిమెంట్ గా అదే డేట్ కి విశ్వంభర రిలీజ్ చేయాలని మేకర్స్ ఫిక్స్ అయ్యారని తెలిసింది. రెండు పాటలు, కొంత టాకీ బాకీ ఉంది. త్వరలోనే షూట్ కంప్లీట్ చేసి అఫిషియల్ గా రిలీజ్ డేట్ ప్రకటించనున్నారని టాక్.
మాస్ మహారాజా రవితేజ 75వ చిత్రం చేస్తున్నారు. ఈ మూవీని సితార ఎంటర్ టైన్మెంట్స్ సంస్థ నిర్మిస్తోంది. సామజవరగమన రైటర్ భాను భోగవరపు ఈ మూవీతో దర్శకుడిగా పరిచయం అవుతున్నాడు. ఈ మూవీకి మాస్ జాతర అనే టైటిల్ ఫిక్స్ చేశారు. దీనికి ఇడియట్ లోని ఫేమస్ డైలాగ్ అయిన మనదే ఇదంతా.. అనేది క్యాప్షన్ గా పెట్టారు. ఈ మూవీని మే 9న రిలీజ్ చేయనున్నట్టుగా ప్రకటించారు. శ్రీలీల కథానాయికగా నటిస్తోన్న ఈ మాస్ ఎంటర్ టైనర్ ధమాకాని మించి ఉంటుందని సమాచారం. ఈ మూవీని సంక్రాంతికే రిలీజ్ చేయాలి అనుకున్నారు కానీ.. రవితేజకు షూటింగ్లో గాయాలు అవ్వడంతో మూడు నెలల బ్రేక్ పడింది. ఇటీవల షూటింగ్ మళ్లీ స్టార్ట్ చేశారు. అయితే.. చిరు విశ్వంభర డేట్ కు రవితేజ వస్తున్నాడు. మరి.. విశ్వంభర వచ్చేది ఎప్పుడో త్వరలో క్లారిటీ ఇస్తారేమో చూడాలి.
