స్టార్ బిరుదు పొందడం చాలా తక్కువ మంది హీరోల విషయంలో జరుగుతుంది. బర్నింగ్ స్టార్ గా ప్రేక్షకుల అభిమానం పొందారు సంపూర్ణేష్ బాబు. హృదయ కాలేయం సినిమాతో ఇండస్ట్రీకి వచ్చిన ఆయన తొలి చిత్రంతోనే నేమ్ ఫేమ్ సంపాదించుకున్నారు. ఈ సినిమా ఇప్పటికీ టీవీ టెలికాస్ట్ లో ప్రేక్షకుల్ని నవ్విస్తుంటుంది. హృదయ కాలేయం సినిమా 11 ఏళ్ల యానివర్సరీ సందర్బంగా సంపూర్ణేష్ బాబు మీడియా సమక్షంలో ప్రేక్షకులకు, తనకు హీరోగా అవకాశం ఇచ్చిన దర్శకుడు సాయి రాజేశ్ కు తన కృతజ్ఞతలు తెలిపారు. ఈ కార్యక్రమంలో
బర్నింగ్ స్టార్ సంపూర్ణేష్ బాబు మాట్లాడుతూ – ప్రేక్షకుల మనసుల్లో బర్నింగ్ స్టార్ గా గుర్తింపు దక్కడం నా అదృష్టంగా భావిస్తున్నా. నరసింహా చారిగా చిన్న పల్లెటూరి నుంచి వచ్చిన నన్ను హృదయకాలేయం సినిమాతో సంపూర్ణేష్ బాబుగా మార్చారు సాయి రాజేశ్ అన్న. ఆయనకు రుణపడి ఉంటాను. హృదయ కాలేయం రిలీజ్ టైమ్ లో దర్శకులు రాజమౌళి గారు చేసిన ట్వీట్ వల్ల నాకు ఎంతో గుర్తింపు దక్కింది. ఎప్పుడు కలిసినా రాజమౌళి గారు సంపూ ఎలా ఉన్నావు అని పలకరిస్తారు. ఆయన సినిమాలో అవకాశం వస్తే అంతకంటే కావాల్సింది ఏముంది. 11 ఏళ్లయినా ఇప్పటికీ హృదయ కాలేయం సినిమా గురించి ప్రేక్షకులు మాట్లాడుకోవడం సంతోషంగా ఉంది. ఈ 11 ఏళ్లలో హీరోగా, క్యారెక్టర్ ఆర్టిస్టుగా పలు చిత్రాల్లో నటించాను. త్వరలో సోదరా అనే మూవీతో మీ ముందుకు రాబోతున్నా. ఈ సినిమా ఈ నెల 25న రిలీజ్ కు వస్తోంది. మరో రెండు సినిమాలు రిలీజ్ కు ఉన్నాయి. కామెడీతో పాటు సీరియస్ క్యారెక్టర్స్ కూడా చేయాలని అనుకుంటున్నా. నా సంపాదనలో కొంత ఛారిటీకి ఇవ్వడం ఎంతో సంతృప్తిని కలిగిస్తోంది. సోషల్ మీడియాలో యాక్టివ్ గా ఉండను. త్వరలో మరిన్ని మంచి మూవీస్ తో ప్రేక్షకుల ముందుకు రాబోతున్నా. అన్నారు.
