ఇప్పుడు బాలీవుడ్ లో టాక్ ఆఫ్ ది టౌన్ గా మారిన సినిమా గదర్ 2. వసూళ్లలో రికార్డులు సృష్టిస్తున్న ఈ సినిమా లేటెస్ట్ గా ఓ ఎవర్ గ్రీన్ రికార్డ్ సొంతం చేసుకుంది. వరుసగా 6 రోజుల పాటు రోజూ 30 కోట్ల రూపాయలకు పైగా వసూళ్లు సాధించిన ఏకైక బాలీవుడ్ మూవీగా చరిత్ర సృష్టించింది. ఇలాంటి సినిమాలను అసలు సిసలు బాక్సాఫీస్ హిట్స్ గా పిలవొచ్చు. శుక్రవారంతో కలిపి దాదాపు 300 కోట్ల రూపాయల మార్క్ కు చేరుకుంది గదర్ 2.
2001లో రిలీజైన గదర్ ఏక్ ప్రేమ్ కథకు సీక్వెల్ గా రెండు దశాబ్దాల తర్వాత తెరకెక్కింది గదర్ 2. సన్నీ డియోల్, అమీషా పటేల్ లీడ్ రోల్ లో నటించిన ఈ సినిమా ఓ పక్కా కమర్షియల్ సినిమా ఎక్సీపిరియన్స్ ను ప్రేక్షకులకు అందించింది. 1971 భారత్ పాక్ యుద్ధ సమయంలో పాకిస్థాన్ ఆర్మీకి చిక్కిన కొడుకును సాహసోపేత పోరాటం చేసి తండ్రి ఎలా కాపాడుకున్నాడు అనే కథ ప్రేక్షకులకు ఎమోషన్, యాక్షన్ ఫీల్ ను పంచింది. వసూళ్ల జోరు తగ్గకపోవడంతో గదర్ 2 మరిన్ని రికార్డులు బద్దలు కొట్టే అవకాశాలు కనిపిస్తున్నాయి.
