క్రిష్ మంచి అభిరుచి గల దర్శకుడు. ఇంకా చెప్పాలంటే.. మంచి స్టోరీ టెల్లర్. మంచి కథలు చెప్పాలి.. అందరికీ చూపించాలనే తపిస్తుంటారు. అయితే.. గత కొంత కాలంగా సరైన సక్సెస్ లేక కెరీర్ లో బాగా వెనకబడ్డాడు. ఇప్పుడు అనుష్కతో ఘాటి అనే సినిమా చేస్తున్నాడు. టీజర్ రిలీజ్ చేసి ఎలా ఉండబోతుందో శాంపిల్ చూపించాడు. మరి.. ఈసారైనా క్రిష్ కష్టానికి ఫలితం దక్కేనా..?
గమ్యం సినిమాతో క్రిష్ కెరీర్ స్టార్ట్ చేశాడు. అల్లరి నరేష్, శర్వానంద్ కాంబినేషన్లో రూపొందిన గమ్యం కమర్షియల్ గా సక్సెస్ సాధించింది.. విమర్శకుల ప్రశంసలు అందుకుంది. గమ్యం తర్వాత వేదం, కృష్ణం వందే జగద్గురుమ్, గబ్బర్ ఈజ్ బ్యాక్, కంచె, గౌతమీపుత్ర శాతకర్ణి, ఎన్టీఆర్ కథానాయకుడు, ఎన్టీఆర్ మహానాయకుడు, కొండపొలం చిత్రాలు తెరకెక్కించారు. పవర్ స్టార్ పవన్ కళ్యాణ్‌ తో వీరమల్లు అనే సినిమాను చాలా వరకు కంప్లీట్ చేశారు. అయితే.. ఆ సినిమా ఎంతకూ కంప్లీట్ కాకపోవడంతో తప్పుకున్నారు. ఇప్పుడు అనుష్కతో ఘాటి అనే సినిమాను తెరకెక్కిస్తున్నారు. ఈ మూవీ టీజర్ రిలీజ్ చేశారు.
ఘాటి మూవీలో అనుష్కను ఎంత వయొలెంట్ గా చూపించబోతున్నారో శాంపిల్ చూపించారు. విజువల్స్, ఇంటెన్స్ చూస్తుంటే.. ఆడియన్స్ కి బాగా కనెక్ట్ అయ్యేలా అనిపిస్తుంది. అడవి, సముద్రం, చెరువుల గుండా అక్రమ రవాణా జరిగే నేర సామ్రాజ్యంలో ఘాటీ మామూలు అమ్మాయి స్థాయి నుంచి అందర్నీ శాసించే స్థాయికి ఎలా ఎదిగింది అనేది ఈ మూవీలో చూపించనున్నారని తెలుస్తోంది. క్రిష్ తన సినిమా కోసం చాలా హార్డ్ వర్క్ చేస్తారు. ఎన్టీఆర్ బయోపిక్, కొండపొలం, వీరమల్లు.. సినిమాలకు చాలా కష్టపడ్డాడు కానీ.. ఫలించ లేదు. ఎంతో కసితో ఈ సినిమా తీసినట్టు అనిపిస్తుంది. మరి.. ఇప్పటి వరకు వచ్చిన ఫెయిల్యూర్స్ ని మరిపించేలా ఘాటి సక్సెస్ అందిస్తుందేమో చూడాలి.
