ఫస్ట్ ర్యాంక్ రాజు, బీచ్ రోడ్ చేతన్, రోజులు మారాయి, గల్ఫ్ వంటి చిత్రాలతో ప్రతిభ గల యువ హీరోగా పేరు తెచ్చుకున్నారు చేతన్ కృష్ణ. ఆయన హీరోగా నటించిన లేటెస్ట్ మూవీ ధూం ధాం ఈ ఫ్రైడే ఆడియెన్స్ ముందుకు వస్తోంది. ఇప్పటికే సాంగ్స్ ఛాట్ బస్టర్స్ కావడం, ట్రైలర్ కు మంచి రెస్పాన్స్ దక్కడంతో ఈ సినిమా మీద ఫ్యామిలీ ఆడియెన్స్ లో బజ్ క్రియేట్ అయ్యింది. ఈ అంచనాలకు తగినట్లే సినిమా తప్పకుండా ఎంటర్ టైన్ చేస్తుందని అంటున్నారు హీరో చేతన్ కృష్ణ. లేటెస్ట్ ఇంటర్వ్యూలో ధూం ధాం సినిమాకు వర్క్ చేసిన ఎక్సీపిరియన్స్, మూవీ హైలైట్స్ తెలిపారు.
హీరో చేతన్ కృష్ణ మాట్లాడుతూ – “ధూం ధాం” మూవీ సెకండాఫ్ మొత్తం పెళ్లి ఇంట సందడితో సాగుతుంది. ఇదే మా “ధూం ధాం” సినిమాకు ఆకర్షణగా నిలుస్తుంది. సెకండాఫ్ లో థియేటర్ నిండా నవ్వులు నిండిపోతాయి. మొన్న వైజాగ్ లో ప్రీమియర్ వేసినప్పుడు కూడా సెకండాఫ్ లో నవ్వులు తప్ప మరే సౌండ్ థియేటర్ లో వినిపించలేదు. అదుర్స్ లాంటి సినిమాల్లో హీరో ఒక ఫేమస్ కమెడియన్ పక్కనే ఉంటూ కథ సాగుతుంది. అలా “ధూం ధాం”లో కూడా నేను వెన్నెల కిషోర్ గారి పక్కనే ఉంటాను. మూవీ షూటింగ్ టైమ్ లో కిషోర్ గారు చాలా సపోర్ట్ చేశారు. సీన్స్ చేసే ముందు నాతో డిస్కస్ చేసేవారు. ఇప్పుడున్న ట్రెండ్ కు భిన్నంగానే నేను “ధూం ధాం” చేశాను. తప్పకుండా ప్రేక్షకులు మా మూవీతో ఎంటర్ టైన్ అవుతారని, సక్సెస్ చేస్తారని కోరుకుంటున్నా. అన్నారు.
