టాలీవుడ్ లేటెస్ట్ సూపర్ హిట్ ఖుషి టీమ్ యాదాద్రి లక్ష్మీ నరసింహ స్వామిని దర్శించుకున్నారు. హీరో విజయ్ దేవరకొండతో పాటు ఆయన పేరెంట్స్, సోదరుడు ఆనంద్ దేవరకొండ, ఖుషి చిత్ర నిర్మాతలు నవీన్, రవి శంకర్, దర్శకుడు శివ నిర్వాణ యాదాద్రీశుడి ఆశీస్సులు తీసుకున్నారు. వీరికి ఆలయ అధికారులు స్వాగతం పలికి స్వామి వారి దర్శనాన్ని దగ్గరుండి చేయించారు. పోలీసులు భద్రత ఏర్పాట్లు చూసుకున్నారు. శుక్రవారం విడుదలైన ఖుషి సినిమా సూపర్ హిట్ అయ్యింది. ఈ సక్సెస్ అందుకున్న సంతోషంలో యాదాద్రి లక్ష్మీనరసింహ స్వామి ఆశీస్సులు తీసుకున్నారు ఖుషి టీమ్.
హీరో విజయ్ దేవరకొండ మాట్లాడుతూ – ఈ ఏడాది మా ఫ్యామిలీకి చాలా కలిసొచ్చింది. మా బ్రదర్ బేబీ మూవీ, నేను నటించిన ఖుషి రెండు సక్సెస్ అయ్యాయి. అందుకు దేవుడికి కృతజ్ఞతలు చెప్పుకునేందుకు మా కుటుంబ సభ్యులతో కలిసి యాదాద్రి శ్రీ లక్ష్మీ నరసింహ స్వామిని దర్శించుకున్నాను. కొన్నేండ్ల కిందట నేను యాదాద్రికి వచ్చినప్పుడు గుడి ఇంత బాగా లేదు. పునర్నిర్మాణంలో యాదాద్రిని అద్భుతమైన ఆలయంగా తీర్చిదిద్దిన తెలంగాణ ప్రభుత్వానికి కృతజ్ఞతలు చెబుతున్నాం. ఏ ఇబ్బందీ లేకుండా దర్శనం చేసుకునేలా ఆలయ అధికారులు, పోలీసులు మమ్మల్ని జాగ్రత్తగా చూసుకున్నారు. వాళ్లకు థాంక్స్ చెబుతున్నా. మా మైత్రీ సంస్థకు కూడా ఈ ఏడాది కలిసొచ్చింది. వాళ్ల రెండు సినిమాలకు నేషనల్ అవార్డ్స్ వచ్చాయి. అలాగే ఇప్పుడు ఖుషి హిట్ అయ్యింది. మాలాగే ప్రతి ఒక్కరూ హ్యాపీగా ఉండాలని దేవుడిని కోరుకున్నా. అని చెప్పారు.
ఖుషి దర్శకుడు శివ నిర్వాణ, నిర్మాతలు వై రవి శంకర్, నవీన్ యెర్నేని యాదాద్రి ఆలయాన్ని అద్భుతంగా తీర్చిదిద్దిన తెలంగాణ ప్రభుత్వానికి కృతజ్ఞతలు తెలిపారు.
