పవన్ కళ్యాణ్ , సాయి తేజ్ హీరోలుగా నటించిన బ్రో సినిమా డిజిటల్ ప్రీమియర్ కు సిద్ధమైంది. ఈ సినిమా ఓటీటీ డేట్ ఫిక్సయ్యింది. ఈ నెల 25న శుక్రవారం బ్రో నెట్ ఫ్లిక్స్ లో స్ట్రీమింగ్ కాబోతోంది. ఈ సినిమా ఓటీటీ రిలీజ్ కోసం ఫిల్మ్ లవర్స్ ఎదురుచూస్తున్నారు. థియేటర్ లో ఏదైనా కారణంతో చూడని వారు నెట్ ఫ్లిక్స్ లో చూడాలని కోరుకుంటున్నారు. ఇక అభిమానులైతే రిపీటెడ్ గా సినిమా చూసేందుకు ఓటీటీ బెస్ట్ ప్లాట్ ఫామ్.
జీవితంలో చేయాల్సిన పనులు చాలా మిగిలి ఉండగానే హఠాత్తుగా చనిపోయిన మార్క్ అనే యువకుడు దేవుడికి తన బాధ్యతల్నీ చెప్పుకుని చావుకు 90 రోజుల గడువు పెంచమని కోరతాడు. అతని కోరికను మన్నించిన దేవుడు బాధ్యతలు నెరవేర్చేందుకు గడువు ఇస్తాడు. మరి ఆ గడువులోగా మార్క్ తన రెస్పాన్సిబిలిటీస్ పూర్తి చేశాడా లేదా అనేది మిగిలిన కథ.
తమిళ హిట్ మూవీ వినోదయ సితమ్ రీమేక్ గా దర్శకుడు సముద్రఖని ఈ సినిమాను తెలుగులో రూపొందించారు. ఈ చిత్రానికి త్రివిక్రమ్ స్క్రీన్ ప్లే మాటలు రాయడం సినిమా మీద మరింత క్రేజ్ పెంచింది. కేతిక శర్మ, ప్రియా వారియర్ కీ రోల్స్ చేశారు. పీపుల్ మీడియా ఫ్యాక్టరీ సంస్థ నిర్మించిన ఈ సినిమా జూలై 28న థియేటర్ లలో గ్రాండ్ గా రిలీజైంది. అయితే సినిమా మీద టీజర్ తో ఏర్పడిన భారీ ఎక్స్ పెక్టేషన్స్ మాత్రం రీచ్ కాలేకపోయింది.
