ఈ నెల 22న మెగాస్టార్ చిరంజీవి పుట్టినరోజును జరుపుకుంటారు. ఈ రోజున అభిమానులు పెద్ద ఎత్తున కార్యక్రమాలు నిర్వహించడం అలవాటే. బ్లడ్ డొనేషన్ క్యాంప్స్ ఇతర సామాజిక సేవా కార్యక్రమాలు నిర్వహిస్తుంటారు. ఇక ఇదే రోజు అభిమానులను ఇంటి దగ్గర, బ్లడ్ బ్యాంక్ దగ్గర కలిసి గ్రీట్ చేస్తారు మెగాస్టార్. ప్రతి పుట్టినరోజుకు తన కొత్త సినిమాల ప్రకటన లేదా అప్పటికి సెట్స్ మీద ఉన్న సినిమాల అప్ డేట్స్ ఇస్తుంటారు చిరంజీవి. అయితే ఈసారి పరిస్థితి భిన్నంగా కనిపిస్తోంది.
ప్రస్తుతం చిరు నటిస్తున్న సినిమాలేవీ సెట్స్ మీద లేవు. పైగా రీసెంట్ మూవీ భోళా శంకర్ అపజయం పాలైంది. ఈ సినిమా మీద భారీగా ట్రోల్స్, విమర్శలు వస్తున్నాయి. భోళా ఫలితంపై మెగాస్టార్ ఇప్పటిదాకా స్పందించలేదు. ఆయన మోకాలు సర్జరీ చేయించుకుని విశ్రాంతి తీసుకుంటున్నారు. దీంతో ఈ సారి పుట్టినరోజు వేడుకల్లో చిరు సినిమాల అప్ డేట్ ఉంటుందా లేదా అనే సందేహం నెలకొంది.
ప్రస్తుతం చిరంజీవి రెండు సినిమాలను లైనప్ చేసి పెట్టుకున్నారు. అందులో ఒకటి బింబిసార దర్శకుడు వశిష్టతో కాగా రెండోది దర్శకుడు కళ్యాణ్ కృష్ణతో చేయాల్సిఉంది. ఈ రెండు సినిమాల్లో మొదట వశిష్టతో సినిమా చేసేందుకు మెగాస్టార్ ఆసక్తిగా ఉన్నట్లు తెలుస్తోంది. ఈ సినిమా అనౌన్స్ మెంట్ చిరు బర్త్ డేకు వస్తుందని టాక్ వినిపిస్తోంది.
