మెగాస్టార్ చిరంజీవి తన కొత్త సినిమా భోళా శంకర్ రిలీజ్ సన్నాహాల్లో ఉన్నారు. దాంతో పాటు ఏపీ ప్రభుత్వంతో చిన్న పాటి విబేధాలు కూడా ఈ మధ్యే ఏర్పడ్డాయి. దానికి క్లారిటీ ఇస్తూ ఆ రోజు తానేం మాట్లాడారో చెబుతూ మరో వీడియో రిలీజ్ చేశారు. ఈ హడావుడి ఒకవైపు ఉంటే ఆయన కొత్త సినిమాకు సంబంధించిన న్యూస్ ఒకటి బయటకు వచ్చింది. యూవీ క్రియేషన్స్ సంస్థలో మెగాస్టార్ తన 157వ సినిమా చేయబోతున్నారనేది ఆ వార్తల సారాంశం.
బింబిసార సినిమాను రూపొందించిన దర్శకుడు వశిష్ట చిరంజీవి సినిమాకు దర్శకత్వం వహించబోతున్నారట. ఈ సినిమాను సోషియో ఫాంటసీ కథతో రూపొందిస్తారని అంటున్నారు. బింబిసారను టైమ్ ట్రావెల్ మూవీగా రూపొందించి ఇండస్ట్రీ దృష్టిని ఆకర్షించారు వశిష్ట. ఆయన కుటుంబానికి దర్శకుడు వీవీ వినాయక్ తో మంచి బాండింగ్ ఉంది. వినాయక్, చిరంజీవి మధ్య ఉన్న సాన్నిహిత్యం తెలిసిందే. వినాయక్ ద్వారానే ఈ ప్రాజెక్ట్ సెట్ అయ్యిందనే వార్తలు వినిపిస్తున్నాయి. ఏమైనా చిరంజీవిని సోషియో ఫాంటసీ సినిమాలో చూసి చాలా రోజులైంది. ఈ ప్రాజెక్ట్ కుదిరితే అభిమానుల కోరిక తీరనుంది.
