నితిన్ కెరీర్ బిగినింగ్ లో వరుసగా సక్సెస్ సాధించాడు. ఆతర్వాత యాక్షన్ మూవీస్ కోసం ట్రై చేసి వెనకబడ్డాడు. లవ్ మూవీస్ చేసి మళ్లీ ట్రాక్ లోకి వచ్చాడు. అయితే.. ఈసారి సరైన కథలు ఎంచుకోకపోవడం వలన వెనకబడ్డాడు. ఇప్పుడు చిరంజీవి మూవీ స్పూర్తితో నితిన్ మూవీ చేశాడని టాక్ వినిపిస్తోంది. ఇంతకీ.. చిరు మూవీ ఏంటి..? మరి.. ఈసారైనా నితిన్ కు సక్సెస్ వచ్చేనా..?
నితిన్ ఇటీవల కాలంలో నటించిన సినిమాలు అన్నీ బాక్సాఫీస్ దగ్గర బోల్తాపడ్డాయి. దీంతో ఈసారి ఎలాగైనా సరే సక్సెస్ సాధించాలని రాబిన్ హుడ్ మూవీ చేస్తున్నాడు. ఈ మూవీకి వెంకీ కుడుముల డైరెక్టర్. మైత్రీ మూవీ మేకర్స్ సంస్థ ఈ చిత్రాన్ని నిర్మిస్తుంది. భీష్మ తర్వాత వెంకీ కుడుముల నుంచి వస్తోన్న సినిమా కావడంతో రాబిన్ హుడ్ మూవీ పై అంచనాలు ఉన్నాయి. అయితే.. ఈ సినిమాకి సంబంధించి ఓ ఇంట్రెస్టింగ్ న్యూస్ బయటకు వచ్చింది. అది ఏంటంటే.. చిరంజీవి కొండవీటి దొంగ సినిమాను స్పూర్తిగా తీసుకుని ఈ సినిమా చేస్తున్నారట. ఈ వార్త లీకైనప్పటి నుంచి రాబిన్ హుడ్ లో కొత్తగా ఏం చూపించనున్నారు అనేది ఆసక్తిగా మారింది.
నితిన్ పవర్ స్టార్ పవన్ కళ్యాణ్ వీరాభిమాని. అందుకనే తన సినిమాల్లో ఏదో సన్నివేశంలో కానీ.. పాటలో కానీ.. పవన్ కళ్యాణ్ చూపిస్తుంటాడు. ఈసారి మెగాస్టార్ చిరంజీవి సినిమా కొండవీటి దొంగ స్పూర్తితోనే రాబిన్ హుడ్ సినిమా చేశాడు అనేది ఇండస్ట్రీ ఇన్ సైడ్ న్యూస్. రాబిన్ హుడ్ కాన్సెప్ట్ దొంగతనాలు చేయడం మీద నడుస్తుంది. ధనవంతుడు దగ్గర దోచుకుని పేదోడికి పెట్టడం అనేది హీరో సిద్ధాంతం. కాకపోతే ఈ దొంగతనాలు అనేవి చాలా కొత్తగా చూపించబోతున్నారని.. వావ్ అనిపించేలా చూపించబోతున్నారని టాక్. కొండవీటి దొంగలో చిరంజీవి ముఖానికి నల్లని ముసుగు వేసుకుని విలన్లను దోచుకుంటూ ఉంటాడు. ఇప్పుడీ నితిన్ పోషిస్తున్న రాబిన్ హుడ్ ఫేసుకు అదే తరహాలో మాస్క్ ఉంటుందట. బ్యాక్ డ్రాప్ కొంచెం సీరియస్ గా అనిపిస్తున్నా.. ఫుల్ ఎంటర్ టైనర్ గా వెంకీ కుడుముల దీన్ని రూపొందిస్తున్నారట. మొత్తానికి ఈసారి నితిన్ చిరంజీవిని నమ్ముకున్నట్టు అనిపిస్తుంది. మరి.. ఈసారైనా నితిన్ సక్సెస్ సాధించి ట్రాక్ లోకి వస్తాడేమో చూడాలి.
