శివ నిర్వాణ.. టాలెంటెడ్ రైటర్ అండ్ డైరెక్టర్. విజయ్ దేవరకొండతో ఖుషి సినిమా తర్వాత ఇంత వరకు కొత్త సినిమా ప్రకటించలేదు. నాగచైతన్యతో శివ నిర్వాణ సినిమా అంటూ ప్రచారం జరిగింది కానీ.. ఆ సినిమా క్యాన్సిల్ అయ్యింది అనేది ఇండస్ట్రీ ఇన్ సైడ్ న్యూస్. మరి.. శివ నిర్వాణ సినిమా ఎవరితో అంటే.. క్రేజీ మల్టీస్టార్ ప్లాన్ చేస్తున్నాడని టాక్ వినిపిస్తోంది. ఇంతకీ.. ఈ క్రేజీ మల్టీస్టారర్ ఎవరితో..?
నిన్నుకోరి సినిమాతో దర్శకుడిగా పరిచయమైన శివ నిర్వాణ తొలి సినిమాతోనే కమర్షియల్ సక్సెస్ సాధించాడు.. టాలెంటెడ్ డైరెక్టర్ అనిపించుకున్నాడు. ఆతర్వాత నాగచైతన్యతో మజిలీ సినిమా తీసి మరో సక్సెస్ సాధించాడు. నానితో తీసిన టక్ జగదీష్ థియేటర్స్ లో రిలీజ్ కాకుండా డైరెక్ట్ గా ఓటీటీలో రిలీజ్ అయ్యింది. ఆశించినంతగా ఆకట్టుకోలేదు. విజయ్ దేవరకొండతో తెరకెక్కించిన ఖుషి మూవీ యావరేజ్ గా నిలిచింది కానీ.. బ్లాక్ బస్టర్ సక్సెస్ సొంతం చేసుకోలేకపోయింది. ఖుషి మూవీ నిర్మించిన మైత్రీ మూవీ మేకర్స్ సంస్థలోనే సినిమా చేసేందుకు ఓకే చెప్పాడట. ఓ మల్టీస్టారర్ స్టోరీ చెబితే బాగుంది.. ఫుల్ స్టోరీ రెడీ చేయమన్నారట. ప్రస్తుతం ఫుల్ స్క్రిప్ట్ రెడీ చేసే పనిలో ఉన్నాడు శివ నిర్వాణ.
శివ నిర్వాణ రెడీ చేసే మల్టీస్టారర్ స్టోరీ ఎవరితో చేయనున్నారంటే.. కోలీవుడ్ స్టార్స్ సూర్య, కార్తీలతో అని సమాచారం. సూర్య, కార్తీ ఈ ఇద్దరు బ్రదర్స్ ఇంత వరకు కలిసి నటించలేదు. ఎప్పటి నుంచో వీరిద్దరూ కలిసి సినిమా చేయాలి అనుకుంటున్నారు కానీ.. సరైన కథ సెట్ కాకపోవడంతో జరగలేదు. శివ నిర్వాణ చెప్పిన స్టోరీ లైన్ బాగుందని.. సూర్య, కార్తి చేస్తే బాగుంటుందని మైత్రీ మూవీ మేకర్స్ భావిస్తున్నారట. సూర్య ప్రస్తుతం కంగువ ప్రమోషన్స్ లో బిజీగా ఉన్నాడు. ఈ మూవీ రిలీజ్ తర్వాత సూర్య, కార్తిలకు శివ నిర్వాణ కథ చెప్పనున్నాడని తెలిసింది. మరి.. శివ నిర్వాణతో సినిమా చేసేందుకు సూర్య, కార్తి ఎస్ అంటారో..? నో అంటారో..? చూడాలి.
