పుట్టినరోజంటే పండగే కదా.. మరి పండగంటే ఎంత సందడి ఉండాలి? అందులోనూ సూపర్‌స్టార్‌ పుట్టినరోజు పండగంటే ఇంకెంత స్పెషల్‌గా ఉండాలి. గత కొన్నేళ్లుగా కనిపిస్తున్న ఆ సందడి ఈ ఏడాది కూడా ఉంటుందా? లేకుంటే పాత జ్ఞాపకాలతో సరిపెట్టుకోవాల్సిందేనా? జక్కన్న ఏం చేస్తున్నారు? కృష్ణవంశీ ఏం చేస్తారు? మహేష్ పుట్టినరోజుకు ఎవరు ఏం గిఫ్ట్ ప్యాక్‌ చేస్తున్నారు.!
ధమ్‌ అదిరిపోవాలి అక్కయ్యో అని మహేష్ అంటుంటే మళ్లీ మళ్లీ వినాలనిపించింది జనాలకు. అలాంటి ధమ్‌ మసాలా బిర్యానీని మళ్లీ ఎప్పుడు వడ్డిస్తారా అని అడగాలనిపిస్తోంది ఇప్పుడు అభిమానులకు.
పెద్ద పనులు చేయాలనుకున్నప్పుడు సమయం కూడా ఎక్కువే పడుతుందని ఎంత సర్దుకుందామనుకున్నా.! ఎక్కడో ఓ మూల.. ఇంకెప్పుడు బాసూ అని అనాలనిపిస్తోంది ఘట్టమనేని సైన్యానికి. ఎప్పుడూ సూపర్‌స్టార్‌ కృష్ణ పుట్టినరోజుకు మహేష్ అభిమానులకు ఏదో ఒక సర్‌ప్రైజ్‌ గిఫ్ట్ అందేది.
ఈ ఏడాది కూడా అలాంటి గిఫ్టే రెడీ అవుతుందని అనుకున్నారు. కానీ ఆ రోజు రానే వచ్చింది. ఏ మాత్రం సర్‌ప్రైజ్‌ చేయకుండా వెళ్లిపోయింది. ఆగస్టు 9న మహేష్ పుట్టినరోజుకైనా ఏదో ఒకటి ఇవ్వకపోతారా? అని ఎదురుచూపులు కనిపించాయి.
కానీ ఈ సారి కూడా జక్కన్న నుంచి ఊపు ఏమీ కనిపించడం లేదు. పుట్టినరోజు ప్రత్యేకతలు ఏమీ ఉండకపోవచ్చనే మాటలే వైరల్‌ అవుతున్నాయి. కానీ, మీరేం ఫికర్‌ కావద్దు నేనున్నా అంటూ మహేష్ ఫ్యాన్స్ కోసం మురారిని రెడీ చేస్తున్నారట కృష్ణవంశీ.
మహేష్ బర్త్ డే కానుకలుగా సినిమాలు రీరిలీజులు కావడం గత కొన్నేళ్లుగా ఆనవాయితీగా మారింది. ఆ కోవలో ఈ సారి మురారిని థియేటర్లలోకి తీసుకురావడానికి సన్నాహాలు జరుగుతున్నాయి.
పాత వెర్షన్‌ని 18 నిమిషాలు ట్రిమ్‌ చేసి, 4కేలో రిలీజ్‌ చేయాలనుకుంటున్నారట కృష్ణవంశీ. ఏదో ఒక గిఫ్ట్ అని సరిపెట్టుకోవాలా? జక్కన్న జర చూడరాదే అంటూ ఆశగా ఎదురుచూడాలా? అనేది మహేష్ ఫ్యాన్స్ డైలమా.