ఈ ఏడాది ఎట్టి పరిస్థితుల్లోనూ తమ అభిమాన హీరో సినిమాను చూసి తీరుతామనే పట్టుదలతో ఉన్నారు పవర్స్టార్ ఫ్యాన్స్ . వాళ్ల ముచ్చటను తీర్చే సినిమాగా హరిహరవీరమల్లు థియేటర్లలోకి దూసుకురానుందా? ఈ డిసెంబర్‌లోపే రిలీజ్‌ డేట్‌ని ఫిక్స్ చేసుకుంటుందా? కెప్టెన్లు మారిన ఈ సినిమా విషయంలో ఏం జరుగుతోంది?
హరిహరవీరమల్లు సినిమా మీద పవర్‌ ఫ్యాన్స్ కి స్పెషల్‌ ఫోకస్‌ ఎప్పుడూ ఉంటుంది. ఆయన కెరీర్‌లో ఫస్ట్ ప్యాన్‌ ఇండియా సినిమాగా ప్రకటించారు ఈ సినిమాను. క్రిష్‌ డైరక్షన్‌లో మొదలైన ఈ సినిమాను ఇటీవల జ్యోతి కృష్ణ టేకప్‌ చేసుకున్నారు. ఇంకో 20 – 25 రోజులు షూటింగ్‌ చేస్తే గుమ్మడికాయ కొట్టేయొచ్చనే టాక్‌ వినిపిస్తోంది.
ఎన్నికల్లో గెలిచాక మూడు నెలలు కేవలం పాలన కోసమే కేటాయిస్తానని అన్నారు పవర్స్టార్. ఆ లెక్కన చూసుకున్నా ఆయన ఆగస్టు నుంచి సినిమాలకు కాల్షీట్లు కేటాయిస్తారనే మాటలు వినిపిస్తున్నాయి. అదే జరిగి పవర్స్టార్ ఫస్ట్ హరిహరవీరమల్లు సెట్స్ కి వచ్చేస్తే, ఈ సినిమాను ఈ ఏడాది విడుదల చేయడం పక్కా.
హరిహరవీరమల్లు డిజిటల్‌ రైట్స్ ను ఆల్రెడీ విక్రయించేశారట మేకర్స్. ఆ డీల్‌ ప్రకారం చూసినా ఈ సినిమాను ఈ ఏడాది విడుదల చేసి తీరాల్సిన సిట్చువేషన్‌ కనిపిస్తోంది. ఈ విషయాన్నే ప్రొడ్యూసర్‌ ఏ.ఎం.రత్నం ఇటీవల పవర్‌స్టార్‌కి వివరించారట. భారీ యాక్షన్‌ సీక్వెన్స్ తో పాటు, శ్రీనిధి శెట్టితో ఓ పాటను కూడా చిత్రీకరిస్తే చాలా వరకు షూటింగ్‌ పూర్తయిపోతుందని చెప్పారట.
మరోవైపు ఓజీ సినిమా గురించి కూడా రీసెంట్‌గా పవన్‌కల్యాణ్‌ ప్రస్తావించారు. ఓజీ చూద్దురుగానీ, బావుంటుంది అని ఆయన ప్రకటించారు. సో, ఫస్ట్ వీరమల్లుని కంప్లీట్‌ చేసి ఓజీ సెట్స్ కి వెళ్తారా? లేకుంటే రెండిటికీ సైమల్‌టైనియస్‌గా కాల్షీట్లు ఇస్తారా? అనేది ప్రస్తుతానికి ఆసక్తికరంగా మారింది.
