ప్లానింగ్ అంటే విశ్వంభర.. విశ్వంభర అంటే ప్లానింగ్.. అందులో మాత్రం తగ్గేదే లే అంటున్నారు దర్శకుడు వశిష్ట. ఒక్క సినిమా అనుభవమే ఉన్నా.. షూటింగ్ విషయంలో మాత్రం 10 సినిమాల అనుభవం చూపిస్తున్నారు వశిష్ట.
200 కోట్ల సినిమాను ఈయన డీల్ చేస్తున్న విధానానికే అంతా ఫిదా అవుతున్నారు. అసలు విశ్వంభర అప్‌డేట్స్ ఏంటి..? ఇంకా షూట్ ఎంత బ్యాలెన్స్ ఉంది..? చిరంజీవి ఫోకస్ అంతా ఇప్పుడు విశ్వంభరపైనే ఉంది.
ఈ చిత్ర షూటింగ్ ఇప్పటికే 70 శాతం పూర్తైంది. ఇందులో త్రిష హీరోయిన్‌గా నటిస్తున్నారు. స్టాలిన్ తర్వాత చిరంజీవి, త్రిష రెండోసారి జోడీ కడుతున్నారు. మధ్యలో ఆచార్య అనుకున్నా.. జస్ట్ మిస్ అయిపోయింది ఈ జోడీ.
త్రిషతో పాటు మరో ఐదుగురు హీరోయిన్లు విశ్వంభరలో నటిస్తున్నారు. అంజి తర్వాత చిరంజీవి నటిస్తున్న సోషియో ఫాంటసీ ఇది. అందులోనూ నమ్రత శిరోద్కర్‌తో పాటు రీమా సేన్, రమ్యకృష్ణ, రాజ్యలక్ష్మి రాయ్, అల్ఫోన్సా లాంటి హీరోయిన్లు స్పెషల్ అప్పియరెన్స్ ఇచ్చారు.
విశ్వంభరలోనూ ఆషికా రంగనాథ్, సురభి, ఇషా చావ్లా, మీనాక్షి చౌదరి కీలక పాత్రల్లో నటిస్తున్నారు. ఆగస్ట్‌లో షూటింగ్ పూర్తి చేసి.. చిరు పుట్టినరోజున టీజర్ ప్లాన్ చేస్తున్నారు వశిష్ట.
చిరంజీవి ఇంట్రో సాంగ్, స్పెషల్ సాంగ్, క్లైమాక్స్ సీక్వెన్స్ మాత్రమే బ్యాలెన్స్ ఉన్నాయి. మరో నెల రోజుల్లో ఇవి పూర్తి కానున్నాయి. 200 కోట్లకు పైగా బడ్జెట్‌తో యువీ క్రియేషన్స్ ఈ సినిమాను నిర్మిస్తుంది.
2025, జనవరి 10న సంక్రాంతి కానుకగా విశ్వంభర విడుదల కానుంది. ఈ సినిమా కోసం బెంగళూరులో మ్యూజిక్ సిట్టింగ్స్ ఏర్పాటు చేసారు కీరవాణి.