వార్ యూనివర్స్ అలాగే కంటిన్యూ కాబోతుందా..? వార్ 3 కూడా త్వరలోనే ఉండబోతుందా..? ముందు సెట్స్‌పై ఉన్న వార్ 2 పూర్తి కానివ్వండి.. ఆ తర్వాత సీక్వెల్స్ గురించైనా.. యూనివర్స్ గురించైనా మాట్లాడుకోవచ్చులెండీ అనుకుంటున్నారు కదా..? మరి ఏం చేస్తాం.. అక్కడున్నది బాలీవుడ్ మేకర్స్ కదా.. అందుకే ముందుగానే యూనివర్స్ నిర్మిస్తున్నారు. మరి ఆ ముచ్చట్లేంటో చూద్దామా..?
బాలీవుడ్‌లో ఇప్పుడు యూనివర్స్‌ల హవా ఎక్కువగా కనిపిస్తుంది. ఏ హీరోను తీసుకున్నా.. ఒక్క సినిమాతో అస్సలు ఆగట్లేదు. చిన్న సినిమా చేసినా కూడా దానికి సీక్వెల్స్ మీద సీక్వెల్స్ చేయాలనుకుంటున్నారు. ఇక స్టార్ హీరోలుంటే.. అస్సలు ఆలోచించట్లేదు దర్శక నిర్మాతలు. ఫస్ట్ పార్ట్ హిట్టైతే చాలు.. యూనివర్స్ అంటున్నారు.
వార్ సినిమా విషయంలోనూ ఇదే చేస్తున్నారు మేకర్స్. హృతిక్ రోషన్, టైగర్ ష్రాఫ్ హీరోలుగా సిద్ధార్థ్ ఆనంద్ తెరకెక్కించిన వార్ సూపర్ హిట్ అయింది. దీనికిప్పుడు అయన్ ముఖర్జీ సీక్వెల్ చేస్తున్నారు. మామూలుగా అయితే దీని గురించి పెద్దగా చర్చ మన దగ్గర జరగదు.. కానీ ఎన్టీఆర్ ఉన్నారు కాబట్టి టాలీవుడ్‌లోనూ వార్ 2పై ఇంట్రెస్టింగ్ డిబేట్ నడుస్తుంది.
వార్ 2 షూటింగ్ వేగంగా జరుగుతుంది. ఇందులో ఇప్పటికే జూనియర్ ఎన్టీఆర్ పోర్షన్ కూడా సగానికి పైగా పూర్తైంది. హృతిక్, తారక్ కాంబినేషన్ సీన్స్ బ్యాలెన్స్ ఉన్నాయి. వాటిని కూడా వీలైనంత త్వరగా పూర్తి చేయాలని చూస్తున్నారు దర్శకుడు అయన్ ముఖర్జీ. వార్ 2 క్లైమాక్స్‌లోనే సీక్వెల్‌కు సంబంధించిన అప్డేట్ ఇస్తారని తెలుస్తుంది.
వార్ 2 సినిమాతోనే బాలీవుడ్‌కు పరిచయం అవుతున్నారు జూనియర్ ఎన్టీఆర్. ఈ సినిమాపై రెండు ఇండస్ట్రీల్లోనూ అంచనాలు మామూలుగా లేవు. ఒకవేళ వార్ 2 హిట్టైతే గనక.. కచ్చితంగా సీక్వెల్ వస్తుంది. అందులోనూ జూనియర్ ఎన్టీఆర్ ఉంటారనడంలో సందేహం లేదు. ఏదేమైనా కూడా వార్ 3 గురించి ఇప్పుడే మాట్లాడటం తొందరపాటే అయినా.. ట్రెండింగ్ టాపిక్ మరి ఏం చేస్తాం చెప్పండి..?
