హ్యాట్రిక్ కొట్టడం అనేది ఏ హీరోకైనా కల..! ఇప్పుడున్న పరిస్థితుల్లో ఒక్క హిట్ కొట్టడమే కష్టం అనుకుంటే.. వరసగా మూడు విజయాలు అందుకోవడం అంటే అద్భుతమే. ఇప్పుడలాంటి అద్భుతానికి చేరువలో ఉన్నారు లోక నాయకుడు.
విక్రమ్ తర్వాత జోరు పెంచిన కమల్.. ఇండియన్ 2తో హ్యాట్రిక్ అందుకుంటారా..? విక్రమ్‌కు ముందు వరకు కమల్ హాసన్ కెరీర్‌లో పెద్దగా జోరు లేదు.. సినిమాలు చేసినా కూడా బాక్సాఫీస్ దగ్గర అవి ప్రభావం చూపించలేదు. కొన్ని సినిమాలైతే వచ్చి వెళ్లినట్లు కూడా ఐడియా లేదు.
అలాంటి పరిస్థితుల్లో లోకేష్ కనకరాజ్ తెరకెక్కించిన విక్రమ్‌తో కమల్ కెరీర్‌కు మళ్లీ ఊపొచ్చింది. కల్కిలోనూ కమల్ మాయ చేసారు. కల్కి సినిమాలో కనిపించింది కాసేపే అయినా.. సుప్రీమ్ యష్కిన్ పాత్ర మరిచిపోలేం.
కల్కి యూనివర్స్‌లో కమల్ హాసన్ పాత్ర మరింత బలంగా ఉండటం ఖాయం. ఇదిలా ఉంటే తాజాగా ఇండియన్ 2తో రాబోతున్నారు ఈ హీరో. జులై 12న విడుదల కానుంది ఈ చిత్రం. 28 ఏళ్ళ తర్వాత భారతీయుడుకు శంకర్ తెరకెక్కిస్తున్న సీక్వెల్ ఇది.
భారతీయుడు 2తో హ్యాట్రిక్ పూర్తి చేయాలని చూస్తున్నారు కమల్ హాసన్. అదెలా అనుకోవచ్చు.. విక్రమ్, భారతీయుడు 2 మధ్యలో కల్కి చేసారు కమల్. అందులో ఆయన హీరో కాకపోయినా.. సినిమా విజయంలో కమల్ పాత్ర కీలకమే.
ఇప్పుడు భారతీయుడు 2తో వస్తున్నారు లోక నాయకుడు. ఇది హిట్టైతే దాదాపు మూడు దశాబ్దాల తర్వాత కమల్‌కు హ్యాట్రిక్ అందనుంది. ఇండియన్ 2 విజయం తమిళ ఇండస్ట్రీకి కీలకంగా మారింది. ఎందుకంటే 2024లో మరీ దారుణంగా ఉంది వాళ్ల పరిస్థితి.
ఇప్పటి వరకు ఒక్కటంటే ఒక్కటి కూడా సాలిడ్ బ్లాక్‌బస్టర్ రాలేదు. వచ్చిన విజయాలు కూడా చిన్నా చితకవే. ఇండియన్ 2 బాగా ఆడితేనే.. రాబోయే సినిమాలకు పరిస్థితులు అనుకూలిస్తాయి. మొత్తానికి చూడాలిక.. కమల్ ఏం చేయబోతున్నారో..?
