భారీ బడ్జెట్‌ సినిమాలు, ప్యాన్‌ ఇండియా రిలీజుల కోసం ప్లానింగ్‌ ఉన్న సినిమాలు ఏడాది అటూ ఇటూ రిలీజ్‌ అయినా ఫర్వాలేదు. ఆ రేంజ్‌ సినిమా కాబట్టి, అందుకు తగ్గ ప్రొడక్షన్‌, పోస్ట్ ప్రొడక్షన్‌ ఇబ్బందులను అందరూ అర్థం చేసుకుంటారు. కానీ మీడియం రేంజ్‌ హీరోలు కూడా రేర్‌గానే పలకరిస్తామంటే ఎలా? ఏడాదికి రెండు మూడు సినిమాలు చేయాల్సిన వాళ్లు ఆచితూచి అడుగులు వేస్తే ఏం చేయాలి? ఇప్పుడు ఇదో ఇంట్రస్టింగ్‌ పాయింట్‌.
రవితేజను చూసి సీనియర్‌ హీరోలే కాదు, యంగ్‌స్టర్స్ కూడా చాలా నేర్చుకోవాలి. ఓ సినిమా సెట్స్ మీద ఉండగానే మిగిలిన సినిమాలను పక్కాగా ప్లాన్‌ చేసుకుంటారనే పేరు ఆయనకు ఎప్పటి నుంచో ఉంది. ఆ ప్లానింగ్‌ వల్లే కాల్షీట్లు వేస్ట్ కాకుండా వరుసబెట్టి సినిమాలు చేయగలుగుతున్నారు. ఈ తరంలో ఆయన్ని ఫాలో అవుతున్న హీరోగా నానీ, పేరు తెచ్చుకుంటున్నారు. సినిమా సినిమాకీ వైవిధ్యం చూపిస్తూనే, మేకోవర్‌ అవుతూనే పెద్దగా గ్యాప్‌ లేకుండా చూసుకుంటున్నారు.
మరి మీడియం రేంజ్‌ హీరోలు ఈ దారిలో ఎందుకు నడవడం లేదు. ఏడాదికి ఒక్క సినిమా రిలీజ్‌ చేయడానికి ఎందుకు సతమతమవుతున్నారు. పోనీ, వారు చేస్తున్న సినిమాలేమైనా భీభత్సమైన ఫిజికల్‌ ట్రాన్స్ ఫర్మేషన్‌ ఉన్న కేరక్టర్లా? అంటే అదీ కాదు… అప్పుడెప్పుడో ఏజెంట్‌తో పలకరించిన అఖిల్‌ నెక్స్ట్ సినిమా ఇప్పటిదాకా పట్టాలెక్కలేదు మరి.
తమ్ముడు అఖిలే కాదు, అన్నయ్య నాగచైతన్య కెరీర్‌ కూడా స్పీడ్‌ మీదేం లేదు. ఆయన చేతిలో ప్రస్తుతం తండేల్‌ మాత్రమే ఉంది. మరో వైపు ఏదో ఒక ఓటీటీ ప్రాజెక్ట్‌ చేస్తున్నా, ఆయన అనుకుంటే ఇంకా స్పీడు పెంచవచ్చు. సైమల్‌టైనియస్‌గా రెండు, మూడు సినిమాలను చేయగల సత్తా ఉండీ, ఆ దశగా ఎందుకు ఫోకస్‌ చేయడం లేదనే విమర్శలు వినిపిస్తున్నాయి.
నితిన్‌, రామ్‌, గోపీచంద్‌, వరుణ్‌తేజ్‌, వైష్ణవ్‌తేజ్‌, కార్తికేయ, నాగశౌర్య… వీళ్ల పరిస్థితి కూడా ఇంతకు మారుగా ఏమీ లేదు. ఆచితూచీ సినిమాలు చేస్తున్నారు. అవి ఆడకపోతే, ఇంకాస్త ఎక్కువ గ్యాప్‌ తీసుకుంటున్నారు. ఆ గ్యాప్‌లో మంచి స్క్రిప్ట్ పడితే ఓకే. ఒకవేళ మళ్లీ తప్పటడుగుపడితే… పెట్టిన బడ్జెట్‌ వసూలు కాక… నిర్మాతలు, డిస్ట్రిబ్యూటర్లు ఇబ్బందులు పడే పరిస్థితి ఎదురవుతోంది. వీటన్నిటికీ ఫుల్‌స్టాప్‌ పడాలంటే మీడియం రేంజ్‌ హీరోలు గేర్‌ మార్చాలి. స్పీడు పెంచాలి. అప్పుడే ఏడాదిలో ఒకటి పోయినా… ఇంకొకటి ఆడినా.. సినిమా ఇండస్ట్రీ కళకళలాడుతుంది. వాళ్ల కెరీర్‌కీ ఢోకా ఉండదు అన్నది శ్రేయోభిలాషుల నుంచి అందుతున్న మాట.
